Það flugu rétt um 76 þúsund útlendingar frá landinu í febrúar en á sama tíma árið 2019 voru þeir tvöfalt fleiri. Engu að síður var erlenda kortaveltan hjá bílaleigum landsins óbreytt þessa tvo mánuði.
Í nýliðnum febrúar nam veltan rúmlega 1,2 milljörðum króna og hún var aðeins 80 milljónum hærri í febrúar 2019.
Þar með fer hlutdeild bílaleiganna af erlendu kortaveltunni úr 9 prósentum uppí 12 prósent. Skýringin liggur að líklega að mestu í hærra leiguverði. Á sama tíma hefur verð á gistingu lækkað og hótelin fá minni skerf af kökunni en áður. Í febrúar 2019 fóru 24 krónur af hverjum 100 sem útlendingar eyddu hér á landi í kaup á gistingu en núna nam hlutfallið 20 prósentum.
Kaup á ýmis konar afþreyingu vega líka sífellt minna í veltutölunum eins og Túristi hefur fjallað reglulega um síðustu mánuði. Á því varð ekki breyting í febrúar eins og sjá má á töflunni sem byggir á tölum Rannsóknarseturs verslunarinnar. Núna fer aðeins um 13 prósent af kortanotkuninni í þennan flokk en var um fimmtungur í febrúar árin 2019 og 2020.