Hátt olíuverð og hækkandi verðbólga mun skila sér út í fargjöldin fljótlega. Um þetta er forstjórar stærstu flugfélaga Evrópu sammála um. Það er þó ekki víst að þessi hækkun muni koma fram alveg strax.
Framboð á flugi nú í apríl og maí er nefnilega umtalsvert meira en eftirspurnin að mati Michael O´Leary, forstjóra Ryanair. Vísaði hann til þess að flugfélög séu núna að setja allt á fullt á ný eftir ládeyðu síðustu missera.
Forstjóri írska lágfargjaldafélagsins gerir því ráð fyrir fargjöldin í vor verði lægri en þau voru á sama tíma árið 2019. Í sumar ætti þróunin hins vegar að snúast við og farmiðaverðið þá almennt hærra en fyrir þremur árum síðan. Þetta kom fram í máli O´Leary á ráðstefnu hagsmunasamtakanna Airlines4Europe sem nú fer fram í Brussel.
Írski forstjórinn bætti því hins vegar við að ástandið á markaðnum væri viðvæmt og þá helst vegna stríðsins í Úkraínu.
Forstjóri Lufthansa, Carsten Spohr, tók undir spá starfsbróður síns hjá Ryanair um hækkandi fargjöld. Ráðlagið þýski forstjórinn því fundargestum að bóka flugmiða sumarsins um leið og hann hefði lokið máli sínu.
Spohr minnti þó á að fargjöld hefðu lækkað mjög mikið í Evrópu síðustu áratugi og yrðu ekki á ný álíka há og þau voru undir lok síðustu aldar. Flug innan Evrópu yrði áfram á viðráðanlegu verði fyrir flesta.
