Það voru 76 þúsund útlendingar sem innrituðu sig í flug frá Keflavíkurflugvelli í febrúar. Þar af voru Bretarnir 29 þúsund eða 38 prósent af heildinni sem er töluvert meira vægi en á sama tíma árin 2019 og 2020 þegar um það bil þrír hverjum tíu voru breskir. Í venjulegu árferði koma hingað fleiri Bretar í febrúar en samanlagt yfir sumarmánuðina þrjá.
Skýringin á þessu aukna vægi bresku túristanna liggur meðal annars í þeirri staðreynd að samdrátturinn í Íslandsferðum þeirra var almennt minni en annarra þjóða. Þannig dróst hópur bandarískra ferðamanna saman um fjörutíu prósent og þeim frönsku og þýsku fækkaði um nærri helming í ferbrúar eins og sjá má hér fyrir neðan.
Af þeim þjóðum sem helst ferðast til Íslands þá voru Hollendingar þeir einu sem voru fjölmennari hér í síðasta mánuði en á sama tíma árið 2020. Framboð á flugi héðan til Amsterdam hefur líka umtalsvert síðustu mánuði því Icelandair, Play og Transavia hafa haldið úti ferðum milli Keflavíkurflugvallar og Schiphol.