Tekjur Play á hvern floginn kílómetra hækkuðu um 35 prósent á milli þriðja og fjórða ársfjórðungs í fyrra. Áfram eru þessar einingatekjur þó töluvert undir því sem var hjá Icelandair á sama tíma.
Það félag fékk að jafnaði 6,9 dollarasent (um 9 kr.) á hvern kílómetra í tekjur síðustu þrjá mánuðina í fyrra á meðan Play fékk 3,9 sent (um 5 kr).
Þegar kemur að einingakostnaði þá var hann ögn hærri hjá Play á þriðja fjórðungi síðasta árs en fór svo undir kostnað keppinautsins síðustu þrjá mánuði ársins. Munurinn er þó ekki mikill eins og sjá má grafinu.
Kaup á eldsneyti eru talinn með í þessum lið en olíuverðið hækkaði á milli þriðja og fjórða ársfjórðungs síðasta árs. Í uppgjöri Icelandair kom fram að félagið greiddi að jafnaði 12 prósent meira fyrir olíu síðustu þrjá mánuðina í fyrra í samanburði við tímabilið júlí til september.
Ljóst má vera að einingakostnaðurinn hjá báðum félögum hefur hækkað umtalsvert það sem af er þessu ári enda hefur olíuverðið hækkað um rúmlega þriðjung frá áramótum. Ef launakostnaður er frátalinn þá eru kaup á eldsneyti stærsti kostnaðarliðurinn í rekstri flugfélaganna.
Við samanburð á einingatekjum og -kostnaði félaganna tveggja verður að hafa í huga að flugleiðir Icelandair eru að jafnaði um fjórðungi lengri en hjá Play. Þar með lækkar gildi beggja þessara eininga hjá Icelandair.
Öfugt við stjórnendur Icelandair þá upplýsir Play um þróun meðalfargjalda. Og þar á bæ fengust að jafnaði 167 dollarar í tekjur af hverjum farþega á fjórða ársfjórðungi sem var hækkun um sjö prósent frá fjórðungnum á undan.