Þeir sem tóku þátt í hlutafjárútboði Icelandair Group haustið 2020 fengu í kaupbæti áskriftarrétt á nýjum hlutum í flugfélaginu sem gefnir hafa verið út í þremur lotum. Í gær lauk úthlutun á þeirri síðustu og skilaði hún flugfélaginu nærri 2,3 milljörðum samkvæmt kauphallartilkynningu.
Þar með fjölgaði útgefnum hlutum í Icelandair um rúmlega fimm af hundraði. Gengi hlutabréfa í Icelandair lækkaði ögn minna í gær eða um 4,7 prósent. Markaðsvirði Icelandair er því núna 76,8 milljarðar króna en var 75,6 milljarðar kr. við lokun Kauphallarinnar föstudaginn sl.
Útgáfa á fyrrnefndum áskriftarréttindum er ekki eina hlutafjáraukningin sem Icelandair hefur staðið fyrir frá stóra útboðinu í september 2020.
Í júní í fyrra voru nefnilega gefin út ný hlutabréf í félaginu sem bandaríski lánasjóðurinn Bain Capital keypti og varð þar með stærsti hluthafinn í flugfélaginu með 16,6 prósent hlut. Sjóðurinn getur svo aukið hlut sinn um fjórðung ef hann nýtir áskriftarréttindi sín í júlí nk. Ef það gengur eftir fær Icelandair inn nýtt hlutafé enn á ný eða í fimmta sinn frá því haustinu 2020.
Eign Bain Capital Credit í Icelandair er ekki skráð á sjóðinn sjálfan heldur írsk félag sem stofnað var um þessi viðskipti.
