Gengi hlutabréfa í Icelandair og Play lækkaði í þarsíðustu viku á sama tíma fór virði hinna norrænu flugfélaganna upp á við. Í vikunni sem nú er senn á enda hækkaði virði íslensku félaganna aftur á móti í takt við hin. Og eins og sjá má á grafinu þá var uppsveiflan mikil.
Icelandair, Play og Finnair hækkuðu öll um 12 prósent í vikunni en hástökkvarinn var aftur á móti Norse Atlantic. Það félag hefur reyndar ekki ennþá opnað fyrir farmiðasölu en til stendur að gera það í næsta mánuði. Stjórnendur félagsins hafa hins vegar dregið úr áformum sínum fyrir sumarið vegna óvissunar sem rekja má til stríðsins í Úkraínu og hærra eldsneytisverðs. Félagið ætlar því að hinkra með áætlunarflug til Bandaríkjanna frá London og láta ferðir þangað frá Ósló duga í bili.