Skortur á íhlutum og hefur orðið til þess að hægt hefur á afhendingu nýrra flugvéla frá verksmiðjum Boeing. Í febrúar voru aðeins 22 þotur fullkláraðar en til samanburðar voru þær 32 í janúar og í desember í fyrra tókst að afhenda 38 þotur samkvæmt frétt Reuters.
Max þotur standa undir stærstum hluta af framleiðslunni hjá Boeing þessi misserin og hefur Icelandair nú þegar fengið þrjár af þeim fimm Max þotum sem félagið átti von á fyrir komandi sumarvertíð. Þar með er félagið með tólf Max þotur í flota sínum í dag.
Spurð hvort útlit sé fyrir drátt á afhendingu þeirra tveggja flugvéla sem út af standa þá segir Ásdís Pétursdóttir, upplýsingafulltrúi Icelandair, að von sé á þeim báðum snemmsumars.
Flestar teknar á leigu
Af þeim tólf Max þotum sem nú eru skráðar í umsjá Icelandair hjá Samgöngustofu þá eru átta í eigu mismunandi flugvélaleiga. Þegar þoturnar voru keyptar á sínum tíma þá stóð til að flugfélagið myndi sjálft eiga meirihluta flugvélanna.
Eignarhaldið á gömlu Boeing 757 þotunum hefur til að mynda alla tíð verið hjá Icelandair en félagið veðsetti tíu þess háttar þotur árið 2019 í tengslum við tíu milljarða króna lántöku hjá Landsbankanum.
Upplýsa ekki um eldsneytissamninga
Nýjar og sparneyttari flugvélar eru kærkomin viðbót við flugflota Icelandair nú þegar þotueldsneyti er mun dýrara en það hefur verið í mörg ár. Í gær kostaði tonn af þotueldsneyti í Evrópu 1.148 dollara en afkomuspá stjórnenda Icelandair gerir ráð fyrir að félagið greiði að jafnaði 800 dollara fyrir hvert tonn af þotueldsneyti í ár.
Icelandair hefur samið um lægra verð á um fjórðungi af eldsneytisnotkun sinni á þeim ársfjórðungi sem hefst nú um mánaðamótin. Frá 1. júlí hefur félagið fest verð á innan við tíund af notkuninni líkt og Túristi greindi frá fyrir þremur vikum síðan. Ekki fást upplýsingar um hvort breytingar hafi orðið á þessum hlutföllum því í svari Icelandai,r við fyrirspurn Túrista, segir að þetta séu upplýsingar sem félagið ætli ekki að birta eða gefa upp á milli ársfjórðunga.
