Það voru nærri tvöfalt fleiri Íslendingar sem flugu út í heim nú í febrúar en í janúar og það er útlit fyrir að straumurinn muni þyngjast áfram.
Því samkvæmt nýbirtum tölum Rannsóknarseturs verslunarinnar þá námu innlend kortaviðskipti við íslenskar ferðaskrifstofur rúmlega 1,4 milljörðum króna í síðasta mánuði. Svo mikil var kortaveltan ekki í þessum mánuði á árunum fyrir heimsfaraldur eins og sjá má á grafinu hér fyrir neðan.
Þess ber að geta að viðskipti Íslendinga við Icelandair og Play eru ekki inn í þessum tölum því félögin tvö notast við erlenda færsluhirða. Það gerði Wow Air líka á sínum tíma.
Spánn er sá áfangastaður sem stærstu ferðaskrifstofurnar hafa lagt mesta áherslu á en samkvæmt úttekt Google þá eru notendur leitarsíðunnar hér á landi líklegastir til að leita eftir flugmiðum til Bretlands þessa daga. Þegar kemur að gistingu þá leita Íslendingar hins vegar oftast að einhverjum samverustað á Spáni.