Samfélagsmiðlar

Segir gjald Icelandair hafa verið hátt og hækki nú enn meira

Það verður margfaldur munur á eldsneytisálagi íslensku alþjóðaflugfélaganna frá mánaðamótum. Forstjóri Play segir gjaldið þar á bæ bygga á einföldum útreikningum. Hann á von á góðu ferðamannaári þrátt fyrir verðhækkanir á farmiðum.

„Við ætlum ekki að selja okkar vörur undir kostnaðarverði þó vissulega ætlum við alltaf að vera með þeim sem bjóða bestu verðin á markaðinum," segir Birgir Jónsson, forstjóri Play.

Play tók upp sérstakt eldsneytisálag í byrjun síðustu viku og nemur það á bilinu 1.300 til 2.200 krónum á hvern fluglegg. Hjá Icelandair hefur lengi tíðkast að eyrnamerkja hluta farmiðaverðsins sem eldsneytisgjald og í dag getur það farið upp í 8.100 krónur í flugi frá Íslandi. Um mánaðamótin hækkar það um allt að helming.

Spurður út í þennan margfalda mun á eldsneytisálagi keppinautanna tveggja þá segir Birgir Jónsson, forstjóri Play, að gjaldið hjá Icelandair hafi verið hátt og hækki nú enn meira.

„Við erum svo sem ekki að hugsa þetta sem samkeppnisatriði þó að við vitum vissulega að Icelandair og fleiri hafi haft þetta gjald í langan tíma. Ég veit ekki hvernig Icelandair reiknar sitt álag út eða hvað er lagt til grundvallar þessu háa gjaldi. Fyrir okkur er þetta einfalt dæmi. Við teljum að þessar hækkanir tengdar stríðinu í Úkraínu muni auka kostnaðinn okkar um 10 milljónir bandaríkjadollara (um 1,3 milljarðar kr.) á þessu ári. Við munum fljúga með um eina milljón farþega á árinu og því er gjaldið reiknað miðað við það og aðrar slíkar forsendur nú í lok mars,“ útskýrir Birgir.

Í álíka stöðu varðandi hækkanir

Hann bætir því við að flugfélagið þurfi að vinna olíuverðshækkunina til baka og sýni viðskiptavinum sínum hvernig.

„Við höfum raunar ekki mætt neinu nema skilningi á þessu gjaldi því allir sjá hvað er að gerast í heiminum. Langflest flugfélög eru nær óvarin [gagnvart hækkunum á eldsneytisverði, innskot. blm.]) frá og með byrjun sumars og því eru almennar verðhækkanir óhjákvæmilegar. Við ætlum ekki að selja okkar vörur undir kostnaðarverði þó vissulega ætlum við alltaf að vera með þeim sem bjóða bestu verðin á markaðinum.“

Búi sig undir gott ferðamannaár

Forstjóri Play á ekki von á því að hækkanir á fargjöldum hafi áhrif á komur erlendra ferðamanna til landsins eða eftirspurn eftir flugmiðum yfirleitt.

„Bókunarstaðan er það sterk og eftirspurnin mikil. Smávægileg hækkun eins og við erum að ræða um vegna eldsneytis breytir litlu. Ísland ætti að búa sig undir gott ferðamannaár og ég held að þær spár sem birtar hafa verið um 1,3 milljónir ferðamanna séu afar varfærnar miðað við bókunarstöðu,“ segir Birgir,

Hann bendir jafnframt á að öfugt við hótelin, þar sem gestir geta afbókað með stuttum fyrirvara, þá séu flugfélögin með „harðar bókanir” og því öruggari með að þeir sem panta farmiða þessa dagana skili sér.

Nýtt efni
Veitingaþjónusta

Íslenskt atvinnulíf er mjög háð aðfluttu vinnuafli. Það á ekki síst við um ferðaþjónustuna. Umsvif hennar væru mun minni ef ekki kæmu hingað útlendingar þúsundum saman til starfa á ári hverju. Samkvæmt Hagstofunni voru 35.233 starfandi í einkennandi greinum ferðaþjónustu á Íslandi í júní 2023. Þar af voru um 15.500 útlendingar.  Heildartalan yfir þá sem …

Áætlunarflug milli Akureyrar og London hófst í lok október og síðan þá hafa þotur Easyjet flogið þessa leið tvisvar í viku en engin talning fer fram á fjölda ferðamanna á Akureyrarflugvelli öfugt við það sem tíðkast á Keflavíkurflugvelli. Til að meta fjölda breskra ferðamanna í beina fluginu þarf því að styðjast við gistináttatölur Hagstofunnar en …

Frakkar fjölmenna til Íslands allt árið um kring og í fyrra flugu frá Keflavíkurflugvelli 99 þúsund farþegar með franskt vegabréf. Það jafngildir því að fimm af hverjum 100 ferðamönnum hér á landi séu franskir enda eru flugsamgöngur milli Íslands og Parísar tíðar og stefnir í að þeir verði óvenju miklar næsta vetur. Það eru því …

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …