Aðalfundur Icelandair fer fram á morgun og þar er munu hluthafar greiða atkvæði um nýtt bónuskerfi fyrir framkvæmdastjórn félagsins og sérvalda starfsmenn. Þar er ætlunin að úthluta allt að 900 milljónum hlutabréfa til hópsins næstu þrjú ár. Markaðsvirði virði þeirra er í dag nærri tveir milljarðar króna.
Til viðbótar er ætlunin að halda í kaupaukakerfi fyrir æðstu stjórnendur sem getur hækkað árslaun þeirra um allt að fjórðung. Það hefur þó ekki reynt á það kerfi um árabil enda var Icelandair rekið með miklu tapi á árunum fyrir heimsfaraldur þrátt fyrir að árin 2018 og 2019 hafi almennt verið góð í fluggeiranum.
Og einmitt sú staðreynd að afkoma Icelandair hafi var neikvæð á þessum árum er ein af ástæðum þess að viðmælendur Túrista, í hópi stórra hluthafa flugfélagsins, eru efins um þessar boðuðu kjarabætur.
Tímasetning á þessu nýja kaupaukakerfi þykir líka slæm að mati sumra sem Túristi hefur rætt við. Er þá bent á að Icelandair hafi notið hárra ríkisstyrkja í heimsfaraldrinum og á sama tíma staðið í kjaradeilum við starfsmenn. Sérstaklega við Flugfreyjufélag Íslands en nýlega felldi félagsdómur þann úrskurð að flugfélagið hafi brotið á nærri sjötíu flugfreyjum og -þjónum við endurráðningar í fyrra.
Viðmælendur Túrista setja einnig spurningamerki við að stjórnendur Icelandair hafi gefið frá sér ríkisábyrgð á lánum í sömu andrá og fyrrnefnt bónuskerfi fyrir yfirmennina sjálfa var kynnt til sögunnar. Það geti varla verið tilviljun því telja megi víst að kjarabæturnar hefðu mætt mótstöðu á Alþingi ef ríkisábyrgðin væri ennþá virk.
Á það er líka bent að í ljósi þeirrar miklu óvissu sem nú ríkir í heimsmálunum þá hefði verið ákjósanlegt fyrir flugfélagið að eiga ríkisábyrgðina inni.