Eitt tonn af þotueldsneyti kostar í dag um 180 þúsund krónur og hefur verðið hækkað um tæpan fimmtung frá því fyrir helgi. Þar með kostar það Play um sex milljónir króna að fylla tankinn á einni af Airbus A321neo þotum félagsins.
Það magn af eldsneyti dugar til að fljúga þotunni um það bil fjórar ferðir milli Keflavíkurflugvallar og Kaupmannahafnar. Kostnaðurinn er því um ein og hálf milljón á hvern fluglegg eða nærri átta þúsund krónur á hvern farþega ef hvert sæti er bókað.
Þegar Play hóf áætlunarflug í lok júní í fyrra var kostnaðurinn nærri helmingi lægri.
Spurður hvort og þá hvenær þessar verðhækkanir á þotueldsneyti skili sér út í verðlagið þá segir Birgir Jónsson, forstjóri Play, að það liggi fyrir að miðaverð muni hækka hjá öllum flugfélögum.
„Þetta er ekkert öðruvísi en hjá öðrum fyrirtækjum sem verða fyrir svona svakalegum hækkunum á aðföngum. Hversu mikið og hversu hratt það gerist er svo önnur spurning. Framboðið er mikið því öll flugfélög eru að reyna að keyra upp eftirspurn eftir heimsfaraldur. Samkeppnin er því hörð. En það er augljóst að félögin geta ekki tekið svona miklar hækkanir á kassann yfir lengri tíma. Það hefur ekki gefið góða raun að selja vörur undir kostnaðarverði í nokkrum rekstri,” útskýrir Birgir.
Kaup á þotueldsneyti vega þungt í rekstri flugfélaga og hjá Icelandair stóð þessi liður undir 21 prósenti af heildarkostnaði fyrirtækisins á síðasta ársfjórðungi 2021. Á því tímabili var olíuverð hátt en engu að síður umtalsvert lægra en það er í dag.
Um langt árabil gerði Icelandair framvirka samninga um fast verð á um sextíu prósent af olíunotkuninni. Í dag hefur Icelandair aðeins samið um kjör á um þrjátíu prósent af eldsneytiskaupunum og borgar því dagsverð fyrir sjö af hverjum tíu tonnum sem félagið þarf. Frá og með 1. júlí hefur Icelandair eingöngu fest verðið á innan við tíund af eldsneytisþörfinni.
Play hefur hingað til keypt alla sitt eldsneyti á dagsverði en mun kynna nýja innkaupastefnu á uppgjörsfundi í lok næstu viku.