Það hafa verið miklar sveiflur á gengi hlutabréfa í flugfélögum allt frá því að innrás Rússa í Úkraínu hófst. Áhrif stríðsins á flugrekstur eru nefnilega margvísleg og þar vegur þungt hið háa olíuverð.
Í vikunni hafa til að mynda stjórnendur Play bætt sérstöku eldsneytisálagi við sín fargjöld og Icelandair hækkar núgildandi álag um helming um mánaðamótin.
Þess má þó að geta að Icelandair hefur gert athugasemd við þá frétt og vísar upplýsingafulltrúi félagsins til þess að hækkunin sé hlutfallslega minni en sem nemi helmingi. Í athugasemdinni segir að Icelandair hafi hækkað eldsneytisgjald árið 2018, úr 4.600 kr. í 5.100 kr. í flugi til Evrópu. Hvað sem þessari verðhækkun líður þá er ljóst að félagið hefur ekki látið hennar getið á heimasíðu sinni því þar segir að eldsneytisálagið sé 4.600 kr. og við þær upplýsingar studdist Túristi við sína útreikninga.
Að hve miklu leyti íslensku félögin koma eldsneytishækkuninni út í verðlagið með hækkandi eldsneytisálagi á eftir að koma í ljós. En ljóst er að í vikunni sem nú er senn á enda þá lækkaði markaðsvirði Play og Icelandair. Og sömu sögu er að segja af gengi bréfa í hinum fimm norrænu flugfélögunum sem skráð eru á markað eins og sjá má á grafinu.