Hlutabréf í Icelandair tóku dýfu í gær eftir að félagið birti uppgjör fyrir fyrsta fjórðung ársins. Þar var niðurstaðan tap upp á 6,4 milljarða króna og afturkölluðu stjórnendur félagsins í framhaldinu fyrri spá sína um jákvæða afkomu í ár.
Í heildina lækkaði gengi Icelandair um tvö prósent í vikunni eftir að hafa hækkað um fimm prósent fyrstu fjóra daga vikunnar.
Markaðsvirði Play lækkaði líka í vikunni og sömu sögu má segja um SAS en viðræður félagsins við starfsfólk og hluthafa eru komnar í öngstræti.
Hlutabréf í norsku lágfargjaldafélagunum þremur hækkuðu hins vegar töluvert í vikunni og þá sérstaklega Flyr því gengið rauk upp um 35 prósent. Þar með hefur verðmæti Flyr tvöfaldast síðustu fjórar vikur en er þó ennþá langt undir því sem var í fyrsta hlutafjárútboði félagsins í mars í fyrra.
Fjárfestar tóku líka vel í það Norse Atlantic er loks farið að selja flugmiða í ferðir sínar frá Ósló til Bandaríkjanna en þar kom á óvart að félagið ætlar ekki að fljúga til Stewart flugvallar í New York heldur til JFK. Talsmaður félagsins sagði í svari til Túrista að skýringin á því væri skortur á þjónustu við fraktflutninga á fyrrnefnda flugvellinum.