Það ríkir almennt bjartsýni í flug- og ferðageiranum fyrir komandi sumarvertíð sem gæti orðið sú fyrsta í þrjú ár með nokkuð eðlilegu sniði. Framboð á flugi frá Keflavíkurflugvelli er til að mynda á pari við það sem var sumarið 2019 en Icelandair og Play standa undir langstærstum hluta þess.
Í júlí næstkomandi stefnir til að mynda í að 72 af hverjum 100 áætlunarferðum verði á vegum íslensku félaganna tveggja.
Afgangurinn skiptist á milli tuttugu og eins erlends flugfélags. Í þeim hópi er Wizz Air stórtækast með Íslandsflug frá tólf evrópskum flugvöllum, þar af fimm pólskum og fjórum ítölskum.
Í heildina munu erlendu flugfélögin fljúga hingað frá 37 mismunandi borgum í Norður-Ameríku og Evrópu. Og í tveimur af hverjum þremur tilfellum etja þau kappi við íslensku félögin, annað hvort annað þeirra eða bæði.
Stjórnendur Icelandair og Play láta þó Wizz Air eftir pólska markaðinn jafnvel þó hér á landi búi rúmlega 21 þúsund pólskir ríkisborgarar.