Verðmæti flugfélaganna hefur rokkað verulega til og frá síðustu vikur. Sveiflurnar frá mánudegi til föstudags hafa þannig reglulega verið mældar í tugum prósenta.
Í vikunni sem nú er senn á enda var dramatíkin hins vegar mun minni eins og sjá má á grafinu hér fyrir neðan. Þar er að finna samanburð á þróun gengis hlutabréfa í þeim sjö norrænu flugfélögum sem skráð eru á markað nú í vikunni. Vegna páskaorlofs þá var viðskiptavikan stutt en reyndar var kauphöllin í Stokkhólmi opin fjóra daga í vikunni því í Svíþjóð er skírdagur ekki frídagur.