Margra ára framkvæmdum við að breyta gamla Landsímahússinu í 148 herbergja hótel fer senn að ljúka. Hótelið ber heitið Iceland Parliament Hotel og verður það sjöunda sem Icelandairhótelin reka í Reykjavík.
Spurður um hvenær hið nýja hótel opni þá segir Tryggvi Þór Herbertsson, stjórnarformaður hótelkeðjunnar, að það verði í júní eða júlí. Hótelið verður markaðssett undir merkjum Hilton keðjunnar líkt og þrjú önnur hótel Icelandairhótelanna í Reykjavík.
Eigandi hótelbyggingarinnar sjálfrar er félagið Lindarvatn en Icelandair Group fer með helmings hlut í því félagi á móti fjárfestingafélaginu Dalsnesi. En um síðustu áramót nam krafa Icelandair samsteypunnar á Lindarvatn samtals 16,6 milljónum dollara. Sú upphæð jafngildir um 2,2 milljörðum króna á gengi dagsins í dag.
Stuttan spöl frá hinum nýja hóteli við Austurvöll, nánar tiltekið við Lækjargötu, opnar nú í sumarbyrjun Hótel Reykjavík Saga sem er í eigu Íslandshótelanna. Þar verða 125 herbergi og það bætast því nærri þrjú hundruð herbergi við úrvalið af hótelherbergjum í miðborginni nú fyrri hluta sumars. Til viðbótar á ennþá eftir að taka öll herbergin á Edition hótelinu við Hörpu í gagnið.
Líkt og fram kom hér á síðum Túrista í vikunni þá er næga gistingu að fá í höfuðborginni í sumar en því er víða öfugt farið út á landi.