Þeir sem bóka í dag vikuferð til New York í júlí mega gera ráð fyrir að borga að jafnaði 62 þúsund krónur fyrir flugmiða út og heim aftur. Verðlagið er þó ólíkt hjá þeim fjórum flugfélögum sem ætla að halda úti daglegum ferðum milli Keflavíkurflugvallar og heimsborgarinnar í sumar.
Í þeim flokki er Icelandair dýrast því hinir svokölluðu Economy Light miðar félagsins kosta að jafnaði 70.556 krónur í júlí. Hjá Delta eru ódýrustu sætin á almennu farrými fjögur þúsund krónum ódýrari eins og sjá má á grafinu hér fyrir neðan.
Sætin á fremsta farrými í Íslandsflugi United seljast vel í sumar eins og Túristi hefur áður fjallað um. Þeir sem sætta sig við að sitja aftar í þotum félagsins borga hins vegar að jafnaði rúmlega 62 þúsund krónur fyrir miðann.
Hjá Play sitja allir á sama farrými og þar eru sætin í dag töluvert ódýrari en hjá keppinautunum þremur. Meðalverðið hjá félaginu, að viðbættri handfarangursheimild, er nefnilega 49.352 krónur sem er um þrjátíu prósent lægra verð hjá Icelandair.
Í könnun Túrista var leitað eftir ódýrasta farinu hjá hverju félagi fyrir sig, hvern einasta dag í júlí. Reiknað var með að hver ferð væri ein vika. Handfarangursheimild var bætt við lægsta verðið hjá Play svo að þjónustan væri álíka hjá öllum fjórum félögum.
Farþegar Delta og United þurfa hins vegar ekki að borga fyrir neinar veitingar í flugferðinni, öfugt við það sem er hjá íslensku félögum. Hjá Icelandair þarf reyndar ekki að borga fyrir óáfenga drykki og þar fá yngstu farþegarnir mat.
