Í sumar munu bæði Czech Airlines og Play fljúga héðan til höfuðborgar Tékklands. Þotur Play fljúga tvisvar í viku á meðan tékkneska flugfélagið verður með allt að þrjár ferðir í viku. Og eins og staðan er í dag þá er verðlagningin hjá félögunum tveimur harla ólík. Farþegar tékkneska félagsins þurfa þannig að borga hátt í helmingi meira fyrir farið frá Keflavíkurflugvelli til Prag í júní en þeir sem kaupa miða hjá Play.
Meðalfargjaldið fyrir aðra leiðina er tæpar 15 þúsund krónur hjá Play en rúmlega 28 þúsund krónur hjá Czech Airlines. Í júlí hækka fargjöldin og munurinn á félögunum tveimur minnkar en svo breikkar bilið á ný í ágúst eins og sjá má á grafinu.
Í könnun Túrista er eingöngu horft til farmiðaverðsins frá Íslandi til Tékklands en hjá báðum flugfélögum borga farþegar aukalega fyrir innritaðan farangur. Hjá Play þarf líka að greiða fyrir hefðbundinn handfarangur.