Það flugu að jafnaði 764 farþegar á dag með Play í mars sem er viðbót um 61 farþega frá því í febrúar. Þessa tvo mánuði voru að jafnaði tvö af hverjum þrjú sæti skipuð farþegum sem er töluvert betra en mánuðina á undan eins og sjá má á grafinu.
Þetta er hins vegar töluvert frá því sem gert var ráð fyrir í svokallaðri sviðmynd sem birt var í tengslum við hlutafjárútboð félagsins í júní í fyrra. Þar var gert ráð fyrir 72 prósent sætanýtingu í fyrra og í ár átti hlutfallið að fara upp í 85 prósent.
Í tilkynningu frá Play segir að þar á bæ séu væntingar um að sætanýting aukist á næstu mánuðum þar sem tengiflug yfir Atlantshafið muni styrkja stöðu félagsins. Er þar vísað til þess að síðar í þessum mánuði fer Play sína fyrstu ferð til Bandaríkjanna, nánar tiltekið Baltimore-Washington flugvallar. Í maí hefst svo áætlunarflug félagsins til Boston og NewYork bætist við í byrjun júní.
Umsvif félagsins muni því aukast til muna en gert er ráð fyrir að félagið flytji hátt í milljón farþega í ár eins og fram kom í viðtali Túrista við Birgi Jónsson, forstjóra Play, nýverið.
Ef það markmið á að nást þá verður farþegunum að fjölga umtalsvert því nú á fyrsta fjórðungi ársins hefur Play aðeins flogið með um 58 þúsund farþega. Farþegahópurinn á degi hverjum þarf því að vera fjórfalt fjölmennari en hann var nú í mars. Þar með verður óseldu sætunum að fækka því flugfloti Play mun aðeins tvöfaldast fyrir sumarvertíðina.