Norse Atlantic Airways hóf sölu farmiða í gær en félagið ætlar sér stóra hluti í flugi milli Norður-Ameríku og Evrópu með fimmtán Boeing Dreamliner þotum. Forsvarsmenn félagsins gáfu það út í vetur að heimahöfn Norse í New York yrði Stewart flugvöllur fyrir norðan stórborgina. Sami flugvöllur og Play ætlar að notast við fyrir sínar ferðir til New York.
Það kom því á óvart að í bókunarvél Norse eru engar ferðir til sölu frá Stewart flugvelli. Í staðinn ætlar Norse að byrja útgerðina vestanhafs á JFK flugvelli sem er miklu stærri og nær Manhattan eyju. Þangað fljúga einmitt þotur Icelandair allt að tvisvar á dag.
Spurður um þessar breyttar áherslur þá segir talsmaður Norse, í svari til Túrista, að áformin um flug frá Stewart standi ennþá. Ferðirnar þangað hefjist þó ekki fyrr en þjónusta við frakt verði þar nægjanlega öflug.
„Vöruflutningar verða stór hluti af tekjum okkar af flugi til Bandaríkjanna og þannig getum við boðið farþegum okkar lág fargjöld,“ útskýrir talsmaður Norse.
Til að byrja með mun Ameríkuflug Norse takmarkast við ferðir frá Ósló til Los Angeles, Fort Lauderdale og Los Angeles en síða er ætlunin að bæta við áætlunarflugi frá Gatwick flugvelli í London. Þar er Icelandair einmitt líka með starfsemi á meðan Play nýtir Stansted flugvöll í London. Sá var reyndar lengi inni í myndinni hjá Norse en þegar félagið fékk lendingarleyfi á Gatwick þá duttu Stansted plönin uppfyrir.