Það verður ekkert af áætlunarflugi Play til Stuttgart í Þýskalandi nú í sumar en aftur á móti sjá stjórnendur þýsks flugfélags tækifæri í að fjölga ferðunum til Keflavíkurflugvallar.
Þann 22. desember mun lágfargjaldaflugfélagið Eurowings nefnilega að hefja áætlunarflug hingað til lands á ný frá Dusseldorf eftir nærri þriggja mánaða pásu. Þotur flugfélagsins munu nefnilega fljúga til Keflavíkurflugvallar í sumar frá bæði Hamborg og Dusseldorf líkt og verið hefur um langt árabil.
Venju samkvæmt leggjast ferðirnar svo af í september en núna ætlar Eurowings að taka upp þráðinn að ný í desember í stað þess að bíða fram til næsta vors. Áætlun félagsins gerir ráð fyrir ferðum á þessari leið alla fimmtudaga og sunnudaga. Flogið er héðan klukkan hálf ellefu á morgnana og lent um kaffileytið í Dusseldorf.
Eurowings er eitt af flugfélögum Lufthansa Group en þrjú önnur flugfélög sem tilheyra samsteypunni eru með áætlunarflug hingað á dagskrá í sumar. Þotur hins þýska Lufthansa koma frá Frankfurt og Munchen, frá Vínarborg flýgur Austrian, Edelweiss frá Zurich og svo Eurowings frá Dusseldorf og Hamborg.
Sölustjóri Lufthansa fór yfir þetta framboð í viðtali við Túrista í febrúar og sagði þá að markaðurinn snérist fyrst og fremst um hópaferðir og fólk á leið í frí. Aftur á móti væri minna um ferðalanga í vinnuferðum.