Malasíska fyrirtækið Berjaya Land keypti 75 prósent hlut í Icelandairhótelunum fyrir þremur árum síðan og stuttu eftir að Covid-19 faraldurinn hófst var gengið frá sölu á síðasta fjórðungnum. Í heildina fékk Icelandair Group nærri sjö milljarða króna fyrir þetta næststærsta hótelfyrirtæki landsins.
Samhliða breyttu eignarhaldi fóru fulltrúar Icelandair úr stjórn hótelanna og þá tók Tryggvi Þór Herbertsson við sem stjórnarformaður. Með honum í stjórninni í dag eru þeir Syed Ali Shahul Hameed, framkvæmdastjóri Berjaya Land og Lee Whye Teng sem einnig vinnur fyrir Berjaya Group, móðurfélag Berjaya Land.
Nú um mánaðamótin var Syed Ali Shahul Hameed hækkaður í tign þegar hann settist í forstjórastól Berjaya Group. Þar hefur hann sinnt margvíslegum störfum síðastliðinn aldarfjórðung og verður nú annar af tveimur forstjórum samsteypunnar.
Spurður hvort þessi breyting verði til þess að Syed Ali hverfi úr stjórn Icelandairhótelanna þá segir Tryggvi Þór að það standi ekki til.
Þess má geta að meðstjórnendur Tryggva sitja báðir í stjórn félags sem ætlað er að byggja upp hótelrekstur á Grænlandi í nafni Berjaya.