Fyrir heimsfaraldur voru Finnair, Icelandair, Norwegian og SAS einu norrænu flugfélögin sem voru skráð á hlutabréfamarkað. Af þessum fjórum er Icelandair komið lengst í að ná álíka mörgum um borð og áður var.
Í mars nýttu 184 þúsund farþegar sér ferðir félagsins frá Keflavíkurflugvelli og Reykjavíkurflugvelli. Þessi fjöldi jafnast á við 63 prósent af farþegahópnum í mars 2019. Finnair og SAS eiga lengra í land en bilið er mest hjá Norwegian eins og sjá má á töflunni.
Farþegar félagsins eru rétt um þriðjungur af því sem var enda stefna núverandi stjórnendur Norwegian ekki á álíka umsvif og voru fyrir Covid-19.
Hjá Norwegian eru óseldu sætin hins vegar hlutfallslega færri en hjá hinum þremur flugfélögunum. Tvö af hverjum tíu sætum seldust ekki í ferðum félagsins í síðasta mánuði.
SAS er hins vegar það félag sem tók stærsta stökkið milli mánaða. Þar fjölgaði farþegum um rúmlega helming frá því í febrúar en hjá Norwegian og Icelandair var aukningin aðeins minni.
Finnair rekur lestina enda byggir viðskiptamódel félagsins að miklu leyti á því að fljúga fólki milli Asíu og Evrópu. Þær samgöngur eru mun minni í dag en áður, bæði vegna sóttvarnaraðgerða í löndum eins og Kína og einnig banni við flugi yfir Rússland.