Það var flogið reglulega til hátt í fjörutíu borga í nýliðnum mars frá Keflavíkurflugvelli en langoftast til London. Ferðirnar þangað voru 175 talsins en næst á eftir kemur Kaupmannahöfn með nærri helmingi færri brottfarir. Nú í sumar má gera ráð fyrir að borgirnar tvær hafi sætaskipti því vanalega fjölgar ferðunum héðan til höfuðborgar Danmerkur yfir háannatímann en aftur á móti fækkar þá ferðunum til Bretlands.
Þar með mun Manchester líka fara neðar á listanum yfir þær tíu borgir sem oftast er flogið til. New York flýgur hins vegar upp listann enda ætla fjögur flugfélög að bjóða upp á ferðir til heimsborgarinnar í sumar.
Icelandair er aftur á móti eitt um ferðirnar þangað núna eins og sjá má á töflunni fyrir neðan. Vægi félagsins er líka hátt í flugi til flestra annarra áfangastaða á listanum, það fer nefnilega aðeins undir helming þegar kemur að London, Manchester og Tenerife. Og það er aðeins í Berlín sem Play nær að halda úti eins mörgum ferðum og Icelandair gerir. Alla vega enn sem komið er.
