Þrátt fyrir að Ítalía hafi farið mjög illa út fyrstu bylgju Covid-19 þá hóf Wizz Air áætlunarflug hingað frá Mílanó sumarið 2020. Stjórnendur Icelandair tóku hins vegar ákvörðun um að fella niður allar ferðir til ítölsku borgarinnar og svo fór að Wizz Air þurfti að bæta við ferðum til að anna eftirspurn.
Íslandsflug ungverska félagsins frá Mílanó komst því strax á gott flug og þegar sumarvertíðin 2020 var gerð upp kom í ljósi að Ítalir streymdu til landsins í meira mæli en til að mynda Spánverjar og Frakkar.
Icelandair tók svo upp þráðinn í ferðum sínum til Mílanó í fyrra og nú í sumar gerir félagið ráð fyrir að fljúga þangað fjórum sinnum í viku frá miðjum maí og fram á haustið. Lagt verður í hann seinnipartinn og þessar ferðir eru því fyrst og fremst stílaðar inn á Íslendinga og ítalska túrista á leiðinni hingað. Aftur á móti hentar flugið ekki þeim sem eru á leið til Bandaríkjanna og eru til í að millilenda á Keflavíkurflugvelli.
Wizz Air gerir út á sömu farþegahópa og nú fær Icelandair líka samkeppni frá Easyjet. Forráðamenn breska félagsins gáfu nefnilega út í dag að í lok maí myndi félagið bæta við Íslandsflugi frá Mílanó og fljúga allt að þrisvar í viku. Easyjet verður jafnframt eina félagið af þessum þremur sem býður upp á brottför héðan að morgni dags.