Stjórnendur breska flugfélagsins British Airways gáfu það út fyrir helgi að þeir þyrftu að draga úr áætlun sumarsins vegna manneklu. Félagið hefur til að myndað fækkað ferðunum hingað til lands frá London næstu mánuði.
Nú liggur fyrir hvernig niðurskurðurinn í Norður-Ameríku verður og ljóst er breska félagið sér fram á minni umsvif í nokkrum af þeim borgum eru hluti af leiðakerfi Icelandair og Play. En bæði félög gera einmitt út á farþega sem eru til í að millilenda á Keflavíkurflugvelli á leið sinni frá Norður-Ameríku til London og annarra áfangastaða í Evrópu.
Í brottförum talið þá er samdrátturinn hjá British Airways mestur í New York því ferðunum til JFK og Newark flugvallar verður fækkað um allt að tólf í viku. Eftir standa þó nærri sextíu brottfarir í viku frá þessum tveimur flugvöllum.
Til Seattle ætlaði British Airways að fljúga tvisvar á dag líkt og Icelandair gerir. Nú hefur ferðunum verið fækkað niður í tólf í viku. Og Icelandair fær líka ögn meiri frið fyrir breska félaginu í Toronto og Montreal í Kanada. Til þeirrar fyrrnefndu munu þotur British Airways fljúga tíu ferðir í viku í stað fjórtán og sex í stað sjö ferða til Montreal.
Á bandaríska höfuðborgarsvæðinu verður svo lengra en áður var áformað á milli brottfara breska félagsins og sömu sögu er að segja um Boston. En farþegar í bæði Washington og Boston hafa val um daglegar ferðir á vegum Icelandair og Play til Evrópu.
Þessu til viðbótar þá hefur bandaríska flugfélagið United fellt niður hluta af ferðum sínumi frá New York til Frankfurt og Parísar í sumar. Einnig verður ekkert af áætlunarflugi til Stokkhólms. Skýringin á þessu liggur í seinkun á því að félagið geti tekið í notkun á ný fjölda Boeing 777 breiðþota. Þetta kemur fram á vef AeroRoutes.
