Þeir sem ætla að fljúga héðan til New York í sumar geta valið á milli daglegra brottfarar á vegum fjögurra flugfélaga. Þar á meðal með Icelandair og Play.
Það síðarnefnda fer jómfrúarferð sína til borgarinnar í byrjun júní og þá til Stewart flugvallar í Hudsondalnum. Icelandair gerir út frá tveimur stærstu flugvöllunum heimsborgarinnar, Newark og JFK. Þotur United og Delta fljúga líka hingað frá þessum tveimur.
Samkeppnin um farþega á leið milli Íslands og New York er því mikil en samkvæmt niðurstöðu, verðkönnunar Túrista fyrir hálfum mánuði síðan voru fargjöldin í júlí lægst hjá Play. Þau voru aftur á móti hæst hjá Icelandair. Bandarísku félögin voru mitt á milli þeirra íslensku.
Í dag eru meðalfargjöld Delta og United komin töluvert upp fyrir Icelandair og Play hefur líka hækkað sína verðskrá. Aftur á móti hefur meðalverðið hjá Icelandair lækkað um fimm af hundraði samkvæmt nýrri verðkönnun Túrista.
Nú kostar flug með Icelandair til New York í júlí og heim aftur viku síðar að jafnaði rúmlega 66 þúsund krónur eða fjögur þúsund krónum minna en fyrir hálfum mánuði síðan.
Hjá Play hefur meðalfargjaldið aftur á móti hækkað um 3.600 krónur og er nú rúmlega 53 þúsund krónur. Hækkunin nemur sjö prósentum.
Í könnunum Túrista er leitað eftir ódýrasta farinu hjá hverju félagi fyrir sig hvern einasta dag í júlí. Reiknað var með að hver ferð sé ein vika og handfarangursheimild er bætt við lægsta verðið hjá Play. Hjá hinum þremur félögunum þarf ekki að borga aukalega fyrir slíkt.
