Sameining Kynnisferða og fjárfestingasjóðsins Eldeyjar var samþykkt af Samkeppniseftirlitinu fyrir ári síðan og nú hefur fyrirtækið fengið nýtt heiti, Icelandia. Í tilkynningu segir að þetta sé regnhlífaheiti sem nái utan um starfsemi Reykjavik Excursions/Kynnisferða, Icelandic Mountain Guides, Iceland Rovers, Dive.is og Flybus.
„Við ætlum okkur stærri hluti á markaðnum og hyggjumst leiða okkar fólk á nýjar slóðir núna þegar íslensk ferðaþjónusta stendur á enn einum tímamótunum. Nýtt og sameinað fyrirtæki undir nafninu Icelandia er til marks um vilja okkar til að standast ekki bara væntingar, heldur verða þekkt sem helsta gáttin að Íslandi,“ segir Björn Ragnarsson, framkvæmdastjóri fyrirtækisins, í tilkynningu.
Spurður nánar út þessa boðuðu gátt þá segir Björn að ferðamenn muni geta bókað þjónustu og vörur frá öðrum fyrirtækjum inn á Icelandia síðunni þegar fram í sækir. Og Björn bætir því við að þau hjá Icelandia séu opin fyrir því að bæta fleiri félögum við samstæðuna.