Nú í ársbyrjun var hægt að leigja nýjar Boeing Max þotur fyrir 300 þúsund dollara á mánuði en sú upphæð jafngildir um 40 milljónum króna. Kjörin í dag eru ekki eins góð að sögn Geir Karlsen, forstjóra Norwegian, sem fór yfir stöðuna á uppgjörsfundi félagsins í síðustu viku.
Norwegian þarf á fleiri Max þotum að halda en samkvæmt forstjóra norska félagsins hefur leigan á nýjum þess háttar flugvélum hækkað um að minnsta kosti 50 þúsund dollara að undanförnu. Sú viðbót jafngildir nærri sjö milljónum króna sem þýðir að leigan er komin upp í um 1,5 milljón kr. á sólarhring. Forstjóri Norwegian sagðist því horfa til þess að kaupa fleiri þotur í framtíðinni í stað þess að leigja.
Icelandair er einnig með til skoðunar að fjölga Max þotunum hjá sér og er bæði horft til þess að leigja þær og kaupa. Í flota Icelandair í dag eru tólf Boeing Max og þar af á flugfélagið fjórar. Nú í sumarbyrjun bætast við tvær leiguvélar í viðbót en þær eru báðar af minni gerð Max þota og með sæti fyrir 160 farþega.
Að jafnaði nýtir Icelandair hverja Max þotu í þrjár ferðir á dag og hver og ein getur þá flutt að hámarki 480 farþega sólarhring. Leiguverðið sem er á markaðnum í dag jafngildir þar með hálfri milljón króna á hverja flugferð eða um þrjú þúsund krónum á hvert sæti.