Þegar Kauphöllin lokaði föstudaginn 18. febrúar sl. þá var samanlagt markaðsvirði Icelandair og Play nærri 97 milljarðar króna. Vikuna eftir réðust Rússar inn í Úkraínu og ennþá geysar stríð í Evrópu. Það hefur þó ekki haft neikvæð áhrif á sölu farmiða samkvæmt því sem fram hefur komið í máli stjórnenda íslensku flugfélaganna.
Óseldu sætunum í þotunum fækkaði til að mynda umtalsvert í apríl og fargjöldin eru almennt á uppleið.
Það sama verður ekki sagt um gengi hlutabréfa í flugfélögunum því þau hafa lækkað umtalsvert. Markaðsvirði Icelandair hefur lækkað úr 78,7 milljörðum króna niður í 61,3 milljarða kr. síðan stríðið hófst. Lækkunin nemur 17,4 milljörðum eða um 22 prósentum. Segja má að lækkunin sé fjórum prósentustigum meiri því hlutafé í Icelandair var aukið í byrjun mars sem vegur upp á móti lækkuninni.
Virði Play hefur lækkað úr 18 milljörðum kr. í 13,6 milljarða kr. frá því að Rússar réðust inn í Úkraínu. Lækkunin nemur 4,4 milljörðum eða 24 prósentum. Samanlagt hefur markaðsvirði íslensku flugfélaganna lækkað um 21,8 milljarða króna síðan stríðið hófst.
Á sama tíma hefur úrvalsvísitala íslensku kauphallarinnar lækkað um 18 prósent.
Í vikunni sem nú er á enda lækkuðu bréfin í íslensku flugfélögunum enn á ný eins og sjá má á grafinu hér fyrir neðan. Þróunin var almennt sú sama hjá hinum norrænu flugfélögunum. Bréfin í Finnair fóru þó upp á við en það félag hefur orðið fyrir miklum búsifjum vegna stríðsins í Úkraínu.
Stór hluti af rekstri flugfélagsins snýst um tíðar ferðir til Asíu og stysta leiðin þangað er yfir Rússland. Nú er rússnesk lofthelgi lokuð og þotur Finnair þurfa langa leið til stórborga í Austurlöndum fjær. Til viðbótar þyngja sóttvarnaraðgerðir í löndum eins og Kína og Japan róðurinn fyrir finnska flugfélagið.
Engu að síður hafa hlutabréfin í Finnair ekki lækkað meira en raunin er hjá Icelandair og Play. Lækkunin nemur rétt um fimmtungi en þó ber að hafa í huga að finnska ríkið á meirihluta í Finnair og þar á bæ er ekki ætlunin að selja bréf eða auka hlutinn.