Það eru sjö norræn flugfélög skráð á hlutabréfamarkað og í vikunni sem nú er á enda lækkaði gengi sex þeirra. Finnair var eina félagið sem hækkaði en hið norska Flyr leiddi lækkanirnar með fjörutíu prósenta hruni.
Skýringin á þeirri gríðarlegu niðursveiflu er að finna í hlutafjárútboði sem félagið réðst í á fimmtudagskvöldið. Þar voru nýir hlutir einmitt seldir með fjörutíu prósent afslætti.
Gengi bréfa í hinum norsku lágfargjaldafélögunum, Norwegian og Norse, fór niður um fimmtán prósent í vikunni og lækkunin hjá Icelandair og Play var líka í takt eins og sjá má hér fyrir neðan.
Markaðsvirði Icelandair er í dag 6,4 milljörðum lægra en það var í lok síðustu viku. Hjá Play nam lækkunin 1,3 milljörðum króna. Ört hækkandi olíuverð hefur líklega einhver áhrif á þessa þróun en tonn af þotueldsneyti kostar í dag 1392 bandaríkjadollara eða sjötíu prósentum meira en um áramótin.
