Allt frá því að Wow Air varð gjaldþrota fyrir þremur árum síðan þá hafa Wizz Air og Easyjet skipst á að vera í öðru sæti yfir umsvifamestu flugfélögin á Keflavíkurflugvelli. Á þeim lista er Icelandair sem fyrr með yfirburðastöðu og nú er Play komið í annað sætið.
Hlutdeild erlendra flugfélaga hefur því dregist verulega saman á milli mánaða. Aðeins þrjár af hverjum tíu brottförum frá Keflavíkurflugvelli í apríl voru á vegum annarra flugfélaga en þeirra íslensku eins og sjá má á grafinu.
Sem fyrr stendur Icelandair undir bróðurparti áætlunarferða frá Keflavíkurflugvelli eða nærri sex af hverjum tíu. Vægi félagsins lækkaði töluvert á árunum 2017 og 2018 þegar Wow Air var á hvað mestu skriði. Þá munað ekki ýkja miklu á hlutdeild Icelandair og Wow Air eins og sjá má á neðra grafinu.
Í apríl 2017 var Wow Air með tólf flugvélar í flota sínum en til samanburðar verður Play með helmingi færri nú í sumar. Félagið stefnir hins vegar á að fjölga flugvélunum upp í tíu á næsta ári og þá ætti hlutdeild Play að aukast umtalsvert frá því sem nú er.