Sá sem nýtir flugleitarvél Google til að bera saman verð á flugi til og frá New York fær ekki áætlunarferðir Play upp sem valkost líkt og Túristi greindi frá í síðasta mánuði. Þá var unnið að því á vegum flugfélagsins að bæta úr þessu en ekkert hefur breyst. Áfram er Stewart International Airport, heimahöfn Play í New York, flokkaður sem flugvöllur í Newburgh hjá Google.
Þeir sem nota leitarvélina til að finna ferðir frá New York til Evrópu fara því á mis við Play og þar með ódýrari fargjöld í mörgum tilfellum. Sem dæmi þá er fyrsta ferð Play frá Stewart flugvelli á dagskrá þann 9. júní. Þann dag kostar ódýrasta farið þaðan til Parísar, með millilendingu á Keflavíkurflugvelli, 59 þúsund krónur ef flogið er tilbaka viku síðar. Google finnur hins vegar ekkert far á minna en 97 þúsund þennan dag frá New York til Parísar. Finna má fjölda álíkra dæma samkvæmt athugun Túrista.
Þriðjungi lægra verð
Spurð um gang mála þá segir Nadine Guðrún Yaghi, samskiptastjóri Play, að samtalið við Google haldi áfram. Hún bætir því þó við að þetta sé ekkert aðalatriði því sala á flugi félagsins til og frá Stewart flugvelli fari mjög vel af stað.
Af fargjöldunum að dæma þá er eftirspurn eftir ferðum Play til Boston og Baltimore þó mun meiri. Í júní kosta farmiðarnir til þessara tveggja borga um þriðjungi meira en til New York. Munurinn er um sex þúsund krónur að jafnaði ef flogið er frá Keflavíkurflugvelli. Svo mikill verðmunur þýðir í raun að tekjur Play af flugi með þéttsetna þotu til Boston eru um einni milljón krónum meiri en til New York.
Völdu frekar JFK
Það var útlit fyrir að Play yrði ekki eina alþjóðaflugfélagið á Stewart flugvelli því Norse, nýtt norskt lágfargjaldafélag, hafði boðað komu sína þangað. Félagið valdi hins vegar JFK flugvöll í staðinn. Skýringin á því er skortur á þjónustu við fraktflutninga á Stewart flugvelli að sögn blaðafulltrúa Norse. Í ferðum Play til New York verður engu að síður boðið upp á vöruflutninga og segir Nadine Guðrún að það verði lítið mál þó frakt sé ekki ráðandi hlutur í starfsemi félagsins.
Fleiri minni flugvellir við borgina
Norse er ekki eina flugfélagið sem horfir til annarra flugvalla á New York svæðinu. Bandaríska lágfargjaldaflugfélagið Breeze ætlar sér til að mynda stærri hluti þar í borg og hóf nýverið sölu á ferðum frá Westchester flugvelli til Los Angeles, San Francisco og Las Vegas. Til viðbótar fljúga flugvélar Breeze líka frá flugvelli við John Arthur flugvöll á Long Island en Wow Air var á sínum tíma orðað hann.
Það stefnir því í að áfram verði umferðin um Stewart takmörkuð og til marks um það þá eru ein áætlunarferð á dagskrá flugvallarins í dag og tvær á morgun. Í öllum tilvikum verður flogið til Flórída.
