Það voru nærri 37 þúsund farþegar sem nýttu sér ferðir Play í apríl og þeir hafa aldrei verið fleiri í einum mánuði. Óseldu sætin voru líka færri en áður því sætanýtingin fór upp í 72 prósent.
Þotur Play sem flugu til og frá Spáni í síðasta mánuði voru þó þéttsetnari því þar voru að jafnaði níu af hverjum tíu sætum skipuð farþegum samkvæmt útreikningum Túrista sem byggja á tölum frá spænskum flugmálayfirvöldum.
Í heildina nýttu tæplega 12 þúsund farþegar sér áætlunarflug Play til og frá Spáni í apríl eða þriðjungur af öllum farþegum félagsins. Ferðirnar til Alicante, Barcelona, Las Palmas og Tenerife stóð samt aðeins undir fjórðungi af sætaframboðinu hjá Play í síðasta mánuði. Sætanýtingin í flug Play til annarra áfangastaða hafa því að jafnaði verið verr nýttar.
Af þeim sökum verður áhugavert að sjá hvernig sætanýtingin hjá Play verður nú í maí þegar umsvif félagsins eru að aukast verulega, bæði með Ameríkuflugi og eins fleiri evrópskum áfangastöðum.
Það eru aftur á mót vísbendingar að ásókn Íslendinga í flug til Spánar sé mikil. Hæstu fargjöldin hjá bæði Play og Icelandair eru í áætlunarfluginu til Tenerife eins og fjallað hefur verið um. Heimamarkaðurinn skilaði Icelandair líka hlutfallslega meiri tekjum á fyrsta fjórðungi ársins en raunin var fyrir heimsfaraldur.