Play er ekki eina norræna lágfargjaldafélagið sem hóf áætlunarflug í lok júní í fyrra því það gerðir líka norska félagið Flyr. Stjórnendur þess þurfa hins vegar ítrekað að leita eftir meira fé.
Það gekk nefnilega hratt á þá tæplega níu milljarða íslenskra króna (600 millj. norskra) sem félagið safnaði í útboði í febrúar í fyrra. Gengið í því útboði var 5 norskar kr.
Hlutabréfin lækkuðu hratt eftir að flugreksturinn hófst enda ljóst að félagið flaug hálftómum þotum milli norskra flugvalla og einnig til suðurhluta Evrópu frá Ósló. Nú um áramótin réðst Flyr í annað hlutafjárútboð og nú var útboðsgengið aðeins 1 norsk króna á hlut. Að þessu sinni söfnuðust um 250 milljónir norskar kr. eða um fjórir milljarðar íslenskra króna á þáverandi gengi.
Síðan þá hefur virði félagsins sveiflast gríðarlega og hækkaði gengi bréfanna til að mynda um 35 prósent í síðustu viku. Sú hækkun hefur að mestu gengið tilbaka í dag og skýringuna er að finna í tilkynningu sem Flyr sendi frá sér í gærkvöld.
Þar var nefnilega boðað til hlutafjárúboðs enn á ný og aftur er leitað eftir 250 milljónum norskum krónum. Skemmst er frá því að segja að sú upphæð er í húsi en útboðsgengið var 1,2 norskar sem þýðir að þátttakendur í útboðinu fengu bréfin með fjörutíu prósent afslætti. Bréfin hafa lækkað í takt við þessi kjör í dag eða um 29 prósent.