Þrátt fyrir samkeppni við þrjú flugfélög um farþega á leið milli Íslands og New York þá er nú þegar uppselt í fjölda ferða Delta frá Keflavíkurflugvelli til JFK flugvallar í sumar. En bandaríska félagið nýtir 225 sæta breiðþotur í daglegt Íslandsflug frá heimsborginni.
Það er sérstaklega yfir hásumarið sem sætin á almennu farrými eru uppbókuð. Það er til að mynda raunin í meira en helmingi brottfara Delta frá Keflavíkurflugvelli í júlí.
Spurð um þessa stöðu þá segir talskona bandaríska flugfélagsins að mjög mikið sé bókað í ferðirnar til Íslands og sérstaklega í júlí. Og það eigi reyndar líka við um flug Delta til Keflavíkurflugvallar frá Minneapolis en sú borg er líka hluti af leiðakerfi Icelandair.
Sumarvertíðin sem nú er hafin er sú ellefta sem Delta tekur þátt í hér á landi en fá erlend flugfélög geta státað af eins mikilli reynslu af sölu flugmiða til Íslands. Engu að síður er staðan þessi að félagið hefur selt upp fjölda ferða án þess þó að vera ódýrasti kosturinn eins og kannanir Túrista hafa sýnt.
Þar hefur Play verið með lægstu meðalfargjöldin en félagið gerir út frá Stewart flugvelli sem er fyrir norðan New York. Icelandair flýgur til JFK flugvallar og Newark en frá þeim síðarnefnda býður United upp á ferðir hingað til lands.
Bæði bandarísku félögin gera ráð fyrir að gera hlé á Íslandsflugi sínum í haust og þá verða Icelandair og Play ein um ferðirnar hingað frá Bandaríkjunum.