Fyrir heimsfaraldur var Norwegian það flugfélag sem flaug flestum milli Íslands og Spánar en norska félagið hefur líka haldið úti Íslandsflugi frá Bretlandi, Svíþjóð, Ítalíu og auðvitað Noregi.
Núna takmarkast umsvif Norwegian á Keflavíkurflugvelli við tvær ferðir í viku frá Ósló en líkt og Túristi greindi frá í vor þá seldust upp margar brottfarir í júní upp með löngum fyrirvara. Og núna eru engin laus sæti í 17 af 28 ferðum Norwegian frá Keflavíkurflugvelli á tímabilinu nóvember til febrúar næstkomandi samkvæmt bókunarsíðu flugfélagsins.
Það er mjög óvenjulegt að flugfélag selji öll sætin sín með svona löngum fyrirvara og því vaknar sú spurning hvort Norwegian ætli í raun að halda úti Íslandsflugi yfir háveturinn.
„Við fljúgum milli Óslóar og Reykjavíkur alla fimmtudaga og sunnudaga og munu halda því áfram í vetur. Það er rétt að fjöldi brottfara til og frá Reykjavík er fullbókaðar í vetur en það er eingöngu vegna þess að Ísland er mjög vinsæll áfangastaður,“ segir talskona Norwegian í svari til Túrista.
Spurð hvort ætlunin sé að bæta við ferðum til Íslands frá Ósló eða hefja flug hingað frá Kaupmannahöfn eða Stokkhólmi þá segir talskona Norwegian að á þessari stundu séu engin áform um slíkt.
Auk Norwegian þá bjóða bæði Icelandair og SAS upp á áætlunarflug milli Keflavíkurflugvallar og Óslóar. Framboðið hjá þeim báðum er mun meira en hjá Norwegian.
