Um langt árabil voru þotur Icelandair fastagestir á Baltimore-Washington flugvellinum en í ársbyrjun 2008 voru ferðirnar þangað blásnar af. Þremur árum síðar tók Icelandair upp þráðinn í flugi til bandarísku höfuðborgarinnar en þá með áætlunarferðum til Washington Dulles flugvallar. Báðar þessar flughafnir eru álíka langt frá höfuðborg Bandaríkjanna.
Þegar Wow Air hóf flug vestur um haf sumarið 2015 þá varð Baltimore-Washington flugvöllur fyrir valinu. Félagið komst þar á gott skrið en svo mætti Icelandair á svæðið fyrir sumarvertíðina 2018. Félagið hafði þó ekki árangur sem erfiði og lagðir ferðirnar niður um haustið og lét Wow Air eftir Íslandsflugið frá Baltimore.
Nú eru þotur Icelandair hins vegar mættar enn á ný til Baltimore og þar með skorar félagið Play á hólm þar í borg en Play hefur flogið þangað daglega síðan í apríl. Upphaflega ætluðu stjórnendur Icelandair aðeins að fljúga til Baltimore fram á haust en nú er hægt að bóka flug með félaginu þangað í allan vetur.
Og það sem meira er þá hefur Icelandair sett í sölu daglegar ferðir til Baltimore frá og með byrjun júní á næsta ári. Til viðbótar við þessar ferðir þá reiknar Icelandair með tveimur brottförum á dag til Washington Dulles flugvallar. Þar með eykst framboð félagsins á ferðum til og frá bandaríska höfuðborgarsvæðinu þónokkuð næsta sumar. Og um leið harðnar samkeppnin við Play en ekki er útilokað að það félag bæti við ferðum til Baltimore.
Sumarið 2018 flaug Wow Air til að mynda tvisvar á dag til borgarinnar annan hvern dag.
