Margir sem búa nærri Reykjavíkurflugvelli hafa á undanförnum árum kvartað undan hávaða og mengun þaðan, ekki síst frá einkaþotum. Áheyrnarfulltrúi vinstri-grænna í borgarráði, Líf Magneudóttir, borgarfulltrúi, lagði til í borgarráði í dag að borgarstjóra yrði falið að semja við samgönguyfirvöld um að einkaþotum og þyrlum verði beint annað, t.d. á Keflavíkurflugvöll og þyrlupalla fjær byggð.
Líf segir á Facebook að meginröksemdin að baki tillögunni sé umhverfisleg en hún varði líka velferð íbúana. Hún lýsir hávaða, mengun og óþef frá umferðinni á flugvellinum – og beinir spjótunum að ríkum ferðamönnum og gestum:
„Varla er til meira mengandi samgöngumáti en einkaþotu- og þyrluflug auðkýfinga og auðmanna. Á tímum baráttu gegn hamfarahlýnun er ólíðandi að yfirvöld greiði fyrir og ýti jafnvel undirnotkun slíkra farartækja með því að finna þeim stað í hjarta borgarinnar.“
Líf Magneudóttir minnir á að Reykjavíkurborg ætli sér að verða kolefnishlutlaus fyrir 2040.
Afgreiðslu tillögunnar var frestað.
—
Þú færð aðgang að öllu efni Túrista næstu tvo mánuði fyrir 2.000 kr. Notaðu afsláttarkóðann SUMAR2022 hér. Áskrift endurnýjast á fullu verði í framhaldinu en alltaf hægt að segja upp.