Leiðin hefur legið niður á við á hlutabréfamörkuðum að undanförnu og Úrvalsvísitala Kauphallar Íslands lækkað um fimmtán af hundraði það sem af er ári. Gengi hlutabréfa Icelandair hefur dregist saman um 14 prósent á þessu tímabili en virði Play hefur lækkað um 31 prósent.
Í vikunni sem nú er á enda hækkuðu bréfin í Icelandair mest allra þeirra norrænu flugfélaga sem eru skráð á markað á meðan Play lækkaði lítillega eins og sjá má hér fyrir neðan.
Það var hins vegar markaðsvirði SAS sem fór mest niður á í vikunni eða um um fjórðung. Verkfall flugmanna félagsins, sem hófst á mánudaginn, hefur haft gríðarleg áhrif á starfsemina því fella hefur þurft niður um helming allra flugferða.
Tapið sem rekja má til þessarar vinnustöðvunar er talið nema um einum milljarði sænskra króna fyrstu sjö dagana en sú upphæð jafngildir um þrettán milljörðum króna.