Viðskipti með hlutabréf í flugfélaginu Play hafa verið lítil að undanförnu og þegar Kauphöllin opnaði síðastliðinn föstudagsmorgun hafði veltan með bréf Play numið rétt um eitt hundrað milljónum króna í júlí. Á föstudaginn var veltan hins vegar þrisvar sinnum meiri eða samtals 314 milljónir króna.
Þar af keypti maki eins af stjórnarmönnum Play bréf fyrir um 109 milljónir króna samkvæmt því sem fram kom í tilkynningu. Gengi hlutabréfa í Play hækkaði um 3,4 prósent á föstudag.
Til samanburðar fóru bréfin í Icelandair upp um 3,02 prósent í 226 milljón króna veltu þennan síðasta viðskiptadag vikunnar. En það var eftir lokun Kauphallarinnar á fimmtudaginn sem Icelandair birti uppgjör sitt fyrir annan ársfjórðung. Þar var niðurstaðan hagnaður upp á um hálfan milljarð króna og greinilegt að flugfélagið fær mun betur borgað fyrir hvert sæti en verið hefur síðust misseri.
Uppgjör Icelandair hefur því mögulega hleypt lífi viðskipti með hlutabréf Play en bíða þarf fram til 26. ágúst eftir uppgjöri þess félags fyrir annan ársfjórðung. Play er nefnilega rúmum mánuði síðar á ferðinni með sitt uppgjör en keppinauturinn.
En þrátt fyrir að Play hafi hækkað meira en Icelandair á föstudaginn þá var það síðarnefnda hástökkvari vikunnar í flokki skráðra norrænna flugfélaga. Bréf Icelandair hækkuðu um níu prósent í vikunni en í öðru sæti var SAS með nærri átta prósenta stökk.