Snorri Pétur Eggertsson, framkvæmdastjóri sölu- og markaðssviðs Keahótelanna, lætur af störfum hjá þessari þriðju stærstu hótelkeðju landsins á næstunni.
Spurður um næstu skref þá segir Snorri Pétur einfaldlega að hann ætli að byrja á því að fara í gott frí en hann hóf störf hjá Keahótelunum haustið 2019 og tók sæti í framkvæmdastjórn fyrirtækisins í byrjun árs 2020.
Snorri Pétur hefur langa reynslu af störfum í fluggeiranum en hann var framkvæmdastjóri tekjustýringar hjá Wow Air og áður einn af lykilstjórnendum Sterling flugfélagsins í Danmörku.
Stærsti hluthafi Keahótelanna er Landsbankinn sem fer með 35 prósent hlut í fyrirtækinu. Þátttaka bankans í rekstri hótelkeðjunnar er tilkomin vegna gjaldþrots móðurfélags Keahótelanna í janúar í fyrra en fyrrum eigendur héldu eftir 65 prósent hlut í fyrirtækinu við breytinguna.
Í þeim hópi er bandaríski fjárfestingasjóðurinn Pt Capital stærstur en þetta er sami sjóður og seldi nýverið stóran hlut í símafyrirtækinu Nova.