Skortur á flugvélum er ein af ástæðum þess að Icelandair þurfti að fella niður rúmlega sextíu flugferðir í síðasta mánuði. Tafir hafa orðið í viðhaldi á eldri flugvélum félagsins og eins hefur biðin eftir tveimur nýjum Boeing Max 8 þotum orðið lengri en reiknað var.
Þoturnar voru leigðar í janúar og þá var reiknað með þeim hingað til lands í vor.
Það gekk ekki eftir því það var fyrst um síðustu mánaðamót sem Boeing flugvélaframleiðandinn afhenti fyrri þotuna. Nú er unnið að því að gera hana tilbúna í flugskýli Icelandair fyrir fyrsta farþegaflugið um miðjan þennan mánuð.
Það verður aftur á móti bið fram í miðjan ágúst eftir því að seinni þotan verði nýtt til að fljúga farþegum Icelandair til og frá Keflavíkurflugvelli samkvæmt upplýsingum frá flugfélaginu.
Með þessum tveimur nýju þotum verða fjórtán Boeing Max flugvélar í flota Icelandair en þær eru mun sparneyttari en gömlu Boeing 757 þoturnar sem hafa verið uppistaðan í flota flugfélagsins síðustu áratugi. Aftur á móti eru færri sæti í þeim enda aðeins pláss fyrir 160 farþega í Boeing Max 8 flugvélum Icelandair en 183 sæti í gömlu flugvélunum.
