Markaðsvirði Icelandair er rúmlega 82 milljarðar króna í dag en gengi hlutabréfa félagsins hafa hækkað um helming frá því um miðjan júní. Þann 16. júní var gengi bréfanna komið niður í 1,39 krónur á hlut og hafði ekki verið eins lágt í eitt ár.
Við lokun Kauphallarinnar á föstudaginn kostuðu bréfin aftur á móti 2,09 krónur og höfðu þá hækkað um sjö af hundraði í vikunni.
Gengi hinna sex norrænu flugfélaganna, sem skráð eru á hlutabréfamarkað, lækkuðu hins vegar vikunni eins og sjá má hér fyrir neðan.
Hlutabréf SAS lækkuðu næst mest en segja má að þau haldi ennþá flugi þrátt fyrir að vera „einskis virði“ eins og einn norskur greinandi fullyrti í vikunni. Vísaði sá til þess að ef fjárhagslega endurskipulagning SAS gengur upp þá verður núverandi hlutafé afskrifað að nærri öllu leyti.