Gengi hlutabréfa í Norwegian féll þegar kauphöllin í Ósló opnaði í morgun. Fyrsta klukkutímann lækkaði gengið um sjö af hundraði en skýringuna er að finna í uppgjör félagsins fyrir annan ársfjórðung en það var birt nú í morgunsárið.
Þar var niðurstaðan sú að hagnaður af rekstri félagsins nam nærri 1,4 milljörðum norskra króna eða um 20 milljörðum íslenskra króna. Greinendur áttu hins vegar von á um þriðjungi meiri rekstrarhagnaði samkvæmt frétt Dagens Næringsliv.
Geir Karlsen, forstjóri Norwegian, segir lakari afkomu skýrast að hluta til af kórónaveirunni sem hafði neikvæð áhrif á reksturinn í apríl. Forstjórinn segir sumarvertíðina hins vegar hafa gengið vel, eftirspurnin sé mikil en hátt olíuverð hafi þó neikvæð áhrif. Fjöldi bókanna í haust lofar góðu en í vetur ætla stjórnendur Norwegian að nýta sér þann sveigjanleika sem samningar við flugvélaleigur gefur. Þar er vísað til svokallaðra „Power by the hour“ samninga en samkvæmt þeim greiðir Norwegian aðeins fyrir þá tíma sem flugvélarnar eru í notkun.
Play hefur einnig farið svipaða leið í sínum samningum við flugvélaleigur en Icelandair ekki.