Í síðustu viku voru hlutabréfin í Icelandair þau einu sem hækkuðu en í vikunni sem senn er á enda fór gengi íslenska félagsins niður á við. Og það sama gerðist hjá hinum sex norrænu flugfélögunum sem skráð eru á hlutabréfamarkað.
Lækkanirnar voru töluverðar eða um sjö af hundraði hjá íslensku félögunum tveimur og líka Norse og Norwegian í Noregi. Þessi neikvæða þróun hjá Norwegian skrifast helst á uppgjör félagsins í lok vikunnar en hagnaðurinn sem þar var kynntur stóð ekki undir væntingum greinenda.
SAS var það félag sem hélt virði sínu best í vikunni þrátt fyrir að uppgjör sem birt var á föstudag hefði staðfest gríðarlegan kostnað af 15 daga verkfalli flugmanna í sumar. Tapið, eftir skatt, nam nærri 27 milljörðum íslenskra króna. Uppgjörið gaf líka sýn á sífellt verri stöðu á sjóðum SAS enda streyma peningarnir þaðan. Meðal annars til að standa straum af málarekstri félagsins vestanhafs en stjórnendur SAS vinna að því að fá svokallaða gjaldþrotavernd, Chapter-11, í Bandaríkjunum.