Lengi vel skiptu Icelandair og Wow Air markaðnum í höfuðborg Bandaríkjanna á milli sín með þeim hætti að það fyrrnefnda gerði út frá Dulles flugvelli en Wow Air fókusaði á Baltimore-Washington flugvöll. Báðir eru álíka langt frá miðbæ Washington borgar.
Sumarið 2018 skoraði Icelandair svo keppinaut sinn á hólm í Baltimore en hrökklaðist þaðan eftir eina mislukkaða sumarvertíð. Árið eftir fór Wow Air á hausinn.
Icelandair tók svo upp þráðinn í Baltimore nú í sumar og hefur att kappi við Play þar í borg síðustu mánuði enda lá það fyrir að nýliðinn myndi reyna að feta í fótspor flugfélags Skúla Mogensen með því að fljúga til og frá Baltimore. Nýverið ákváðu stjórnendur Icelandair að halda ferðunum til borgarinnar áfram í vetur.
Kollegar þeirra hjá Play ætla að svara þeirri ákvörðun með því að skora sinn helsta keppinaut á hólm á Washington Dulles flugvelli. Þann 26. apríl á næsta ári fer Play nefnilega sína fyrstu ferð þangað og í framhaldinu munu þotur félagsins fljúga daglega til Dulles samkvæmt því sem fram kom á fundi forstjóra Play með fjárfestum nú í morgun.
Samkeppni íslensku félaganna tveggja verður því óvenju hörð næsta sumar á bandaríska höfuðborgarsvæðinu.