Hagnaður af rekstri Íslandshótelanna, stærsta hótelfyrirtækis landsins, nam 904 milljónum króna á fyrri hluta þess árs. Viðsnúningurinn er skiljanlega mikill þegar horft er til síðustu tveggja ára enda höfðu sóttvarnaraðgerðir vegna Covid-19 gríðarleg áhrif á ferðaþjónustuna.
Og segja má á að útbreiðsla ómíkrón afbrigðis kórónuveirunnar hafi líka haft neikvæðar afleiðingar í byrjun þessa árs. Engu að síður voru tekjur Íslandshótelanna, fyrstu sex mánuðina, rétt um 5,2 milljarðar króna. Á fyrri hluta ársins 2019 námu tekjurnar 4,9 milljörðum kr. og 5,4 milljörðum á sama tímabili metárið 2018.
Tekjur Íslandshótelanna á fyrri helmingi ársins voru því á pari við sama tímabili árið 2018. Þá voru erlendu ferðamennirnir hins vegar miklu fleiri en núna eða um ein milljón talsins fyrstu sex mánuðina en rúmlega sex hundruð þúsund á sama tíma í ár.
Davíð Torfi Ólafsson, forstjóri Íslandshótelanna, segir aðspurður um þessa þróun að apríl, maí og júní hafi verið metmánuðir hjá fyrirtækinu enda hafi orðið mikil aukning um leið og takmörkunum var létt á landamærunum. Verðlag hefur líka almennt hækkað að sögn forstjórans.
Þá hefur íslenskum gestum fjölgað verulega bendir Davíð Torfi á og eins voru ráðstefnur fleiri en áður og hvataferðum fjölgaði. Stóra tölvuleikjakeppnin sem fram fór í Laugardalshöll í apríl hafði líka jákvæð áhrif á stöðu Íslandshótelanna.
Fjöldi herbergja á vegum hótelfyrirtækisins, á fyrri hluta ársins, var hins vegar álíka og fyrir fjórum árum síðan. Viðbótin nam aðeins 61 herbergi. Í byrjun þessa sumars bættust svo önnur 122 við þegar Hótel Reykjavík Saga opnaði í Lækjargötu. Innan vébanda Íslandshótelanna eru því í dag 1963 herbergi í heildina.
Eins og sjá má hér fyrir neðan þá var vægi veitingasölu hærra í heildartekjum Íslandshótelanna á fyrri hluta þessa árs en árin fyrir Covid-19.
