Gistinætur á skráðum gististöðum voru nærri 1,5 milljón í ágúst síðastliðnum og hafa þær aldrei verið fleiri í þessum mánuði. Hlutdeild hótelanna á gistimarkaðnum nam 40 prósentum í ágúst sem er á pari við það sem var í ágúst 2019.
Á þessum þriggja ára tímabili hefur þó orðið töluverð breyting á vægi íslenskra og erlendra gesta á hótelum landsins.
Í ágút 2019 stóðu útlendingar til að mynda undir 93 prósentum af öllum gistinótum á íslenskum hótelum. Í síðastliðnum ágúst var hlutdeildin 82 prósent. Breytingin á blöndu íslenskra og erlendra gesta er mismikil eftir landshlutum eins og sjá má hér fyrir neðan. Á Austurlandi voru Íslendingar þriðjungur hótelgesta í ágúst en þeir voru rétt um 8 prósent af heildinni í ágúst árið 2019.
Eins og gefur að skilja er hlutdeild heimamanna lægst í höfuðborginni enda býr stærsti hluti þjóðarinnar á suðvesturhorninu.
Mikil aukning fyrir vestan
Ef horft er fjölgunar á gistinóttum á hótelum eftir landshlutum þá bæta hótelin á Vesturlandi og Vestfjörðum mestu við eða 36 prósentum. Aukningin á Suðurlandi nam fimm af hundraði en á landsvísu nam vöxturinn 14 prósentum eins og sjá má hér fyrir neðan.
Sem fyrr segir byggir þessi samantekt eingöngu á stöðunni í ágúst síðastliðnum en nú taka við rólegri mánuðir víða um land, til að mynda á Vestfjörðum eins og Kristján Þór Kristjánsson, hótelstjóri Hótel Ísafjarðar, ræddi núverið við Túrista.
„Vandinn við að reisa nýtt og stórt hótel er bara að ennþá þarftu að fjármagna reksturinn á fimm mánuðum. Það er meginskýringin á því að ný hótel hafa ekki verið reist á Vestfjörðum. En með bættum samgöngum, nýrri hringtengingu um Vestfirði sem opin verður árið um kring, má búast við að fleiri tækifæri onast í afþreyingu og þörf verði á meira gistiplássi,” sagði Kristján.
Ástæða þess að hér er eingöngu horft til hótelmarkaðarins er sú að ekki er hægt að greina gistinætur eftir landshlutum nema í þeirri tegund gistingar í tölum Hagstofunnar fyrr en í lok árs.
