Stjórnendur Ölgerðarinnar hafa hækkað spá sína um hagnað á yfirstandandi fjárhagsári um allt að hálfan milljarð króna og gera þeir ráð fyrir að svokölluð EBITDA afkoma verði á bilinu 4,1 til 4,4 milljarðar króna. Í kauphallartilkynningu segir að rekja megi breytinguna fyrst og fremst til tveggja þátta.
Annars vegar hefur sala á vörum fyrirtækisins á hótelum og veitingastöðum aukist, ekki síst vegna umtalsverðrar fjölgunar ferðamanna. Hins vegar er hlutdeild Ölgerðarinnar í bjórsölu hjá ÁTVR stærri en áætlanir gerðu ráð fyrir.
Aðspurður segir Gunnar B. Sigurgeirsson, aðstoðarforstjóri Ölgerðarinnar, að aukning í sölu á veitingahúsamarkaði og fjölgun ferðamanna vegi þyngra endurskoðun á afkomu en meiri sala í ÁTVR. Bendir hann á að það hafi ríkt deyfð yfir fyrrnefnda markaðnum í fyrra vegna Covid-19 en aukning á veitingahúsamarkaði sé einnig tilkomin vegna aukinnar hlutdeildar.
„Við sjáum verulega aukningu í fjölda viðskiptavina og það er greinilegt að vöruflóran okkar og þjónustustig er að falla í kramið á markaðnum,“ bætir Gunnar við.
Spurður hvort einhverjar tegundir af bjór seljist betur núna en áður þá segir Gunnar að lágkolvetnabjórinn Gull Lite hafi selst gríðarlega vel eftir að hann varð fáanlegur á veitingastöðum um land allt og meðal annars á krana. Og til marks um hve þessi tegund hefur fallið í kramið þá hefur Ölgerðin fengið fyrirspurnir frá áhugasömum túristum sem eru spenntir fyrir útflutningi á Gull Lite.
Gunnar bendir jafnframt á að almennt hafi eftirspurn eftir íslenskum vörumerkjum aukist verulega enda vilji erlendir ferðamenn gjarnan prófa innlendan bjór. Ölgerðin selur veitingahúsum þó ekki eingöngu öl því fyrirtækið er einnig með fleiri áfengistegundir á boðstólum, gosdrykki, kaffi og fleira.
Það er óhætt að fullyrða að það eru fleiri en stjórnendur Ölgerðarinnar sem finna fyrir auknum umsvifum á íslenskum matsölustöðum, börum og kaffihúsum. Því líkt og fram kom í nýrri samantekt Túrista þá tvöfaldaðist erlenda kortaveltan í veitingageiranum í sumar og hefur hún ekki áður verið svo mikil í krónum talið. Aukningin frá sumrinu 2019 er töluvert umfram almennar verðlagshækkanir.
